في هذه الليله كان الجو معتدل وكانت تسري خلاله نسمة رقيقة تجبرك على هجر المنزل فورا لتذهب لمكانك المفضل
نعم هو
عند الساقيه القديمه البعيده
ولابد من رفيق وكان هو نفس الرفيق المتفلسف الغامض وقد كان
مساء الخير يا خالد
مساء النور
ايه رأيك نتمشى شويه
عز الطلب يا جميل يالله بينا
أخذ كل منا جلسته المعتاده نظرت اليه متأملا ذلك الشرود ودار بيننا حديث تقليدي عن احوال الناس والجديد فى الدنيا ، لم أكن أرغب فى الثرثرة لكنى كنت أريد أن أصل الى هدف آخر ، أريد أن أفهم لم يبدوا على صديقى شرودا أغلب الوقت ولم ذلك الغموض فى شخصيته وماهي مشكلته التى يعانيها تحديدا ، أعرف أنها مهمة صعبة مع واحد مثله ذو لسان متكلم وعقل متفلسف يحب ان يدور حول الموضوع ولا يقتحمه ، لكنى اردت أن أعرف
مالك ياعم انت معجب بيا ولا ايه ؟
ههههههههههههههههه
أخرجتنى ملاحظته مما كنت أفكر فيه وتضاحكت وانتقلت بالحديث الى التساؤل عن احواله هو
أحوالي ؟ نحمد الله بس السؤال ممكن يتجزئ
نجزئه يا افندم نقول مثلا ماديا؟
ماديا الأمور ممستقره أو شبه مستقره وفيه أمل
وثقافيا يا محترم ؟
ثقافيا حلوة دي ، ثقافيا مافيش جديد فى الإضافات من القرائات لأن الموارد قليله شويه بس الإستعارات بتعمل اللازم مؤقتا وربنا يبعت
بس تعرف كونك تقرى لون واحد ده ملل أنا كنت مصر مثلا على الروايات بس ولمؤلفين عرب كمان زى السباعى ومحفوظ لكن بدأت أنوع لاقيت الموضوع جميل
طيب نقول إجتماعيا ؟
دايرة العلاقات الإجتماعيه عندي منحصره عليكم حبايبى وصحابى والفتره اللى فاتت بعدت عن قرايبى كتير مش بزور حد منهم مثلا خالتى مش روحتلها من بعد العيد الكبير ومن ده كتير ، الزيارات قلت جداااا بقت الدايرة ضيقه زى ماقلتلك ومنحصره على قعدة القهوة والصومعه بتاعتنا
طيب ليه ؟
الحقيقه ممكن تقول زهد في العلاقات مش عايز أنخرط وسطهم ومش بلاقى وقت للزيارات أصلا لأنى زى مانت عارف برنامج يومى ومش بقيت اعرف اعدل فيه بكتير الوقت الوحيد اللى بكون فيه فاضى الساعه 2 بعد نص الليل لو مستعدين انى ازورهم فى الوقت ده ماعنديش مانع
لا تعليق
ندخل على نفسيا بقى ؟
معنويا - الحالة المزاجيه والمود - أغلب الوقت مش باسأل نفسي ومش بفكر فى البحث
السعاده هى ألا تتوقف لتسأل إذا ما كنت سعيدا
بس مش كل الأوقات باستمر فى التجاهل للموضوع وبفكر
الاقى اننا بنكون منزعجين من حاجات تافهه وبنقيم بسببها مياتم وننصب منادب ونقعد نبكى وده لأنها بتصادف جوانا إستعداد للحزن مش لأنها من الفظاعه لدرجة إنها تخلينا نحزن ونكتئب
جميله النقطه اللى عدت دي تعرف انى بدأت اشك إنك بتتكلم صح ؟
ههههه ماشى هاعديهالك بس بغرامه سيجاره من علبتك
برضه فى نفس الوقت بضحك ونفرح من أتفه شئ بس لمجرد إنه حصل فى الوقت اللى أنت فيه مستعد تكون مبسوط وتضحك
ده طبعا مش كل الأوقات ؟
مظبوط لأن فيه حاجات بتحصل بتكون جديره إنها تبهجك أو تحزنك لمجرد حدوثها بس التقييم بيختلف من واحد للتانى يعنى اللى يفرحك ممكن ما يفرحنيش
طبعا ده شئ مفروغ منه
أنا برضه زي كل الناس ممكن تصادف نفسي المستعده للبهجه أي تصرف وتنجلي بسببه وتنبسط والعكس بيحصل غالبا لأنها مياله للحزن أكتر شويه وفى نفس الوقت بتكرهه جدا يعنى أنا بكره الوجوه الحزينه المكتئبه وبحب أتطلع لأى وجه جميل وأتأمله خصوصا الأطفال لكن
عشان كده بقول انى بكره الحزن
تعرف مسلسل ليالى الحلميه
ايوة طبعا عارفه بتاع سلامونتي
ايوة المسلسل ده مهما اتعاد بحب اسمعه بتحدفني جملة فى حوار بين أنيسه وعلي البدري لمنطقه فى منتهى الرقه فى النفس البشريه وبتلمس جوايا موسيقى المسلسل التصويريه وأحداثه الدراميه الخطيره والشخصيات اللى كتبها اسامه بحرفيه غير عاديه زى على وزهره وشيرين والكبير قوى يحيي الفخراني سليم البدري
ايوة ايوة أنت مغرم بيه أنا عارف
ده من ناحية المشاعر الإنسانيه وكده إنما الكوميديا والبهجه بقى
سليم باشا غانم أبو الشهيد تمام وعضو مجلس النواب
ههههههههههههههههههه
العمده
هو ده ياسلام عليه وهو بيقول جاااااااااااي ولما يحكى قصة نزاكه ويقارن بينها وبين صاحبة العصمه وصيفه هانم
بيموتنى من الضحك حتى لو قاعد لوحدى باتفرج عليه
هو أنت لازم يعنى تبقى مع حد عشان تضحك
الضحك معدي ولما بتضحك بتكون عايز مشاركه انما لما بتعيط مش بتحتاج لحد
ماعلينا
برضه أنت ماجاوبتش على سؤالى عن أحوالك النفسيه ولففتنى دايرة كبيره دخلتنى على الحلميه والمش عارف ايه
اجاوبك ياعم
نفسيا وحاليا المزاج معتدل والحمد لله
أخيرا نطقت الحمد لله بدون لف ودوران وتفلسف
قولى بقى يا مبارك
وكيف حالك عاطفيا ؟؟؟
..........................
