هو انت بتقرا ليه ؟
سؤال صدمه بصراحه سألهولى واحد من زمايلنا اللى كانوا معانا فى الإعدادى وطلع ناصح ودخل صنايع ودلوقتى شغال فى مصنع وبيقبض مرتب وقريب هايتجوز
صاحبنا دوة دماغه ما تحتملش انها تفكر موجوده كماليات يعنى
قوم ايه بقى
سألنى السؤال ده وهو قاعد معانا على القهوة
ده على اعتبار اننا مش بنتكبر على اللى اقل مننا فى مستوى الثقافه والفكر وبنخلى امثاله يقعدوا معانا على طاولة واحده
انت بتقرا ليه ؟
يادي النيله اقوله ايه ده بقى ؟
حط نفسك مكانى يا محترم وشوف كده ممكن تقوله ايه
سالته بدورى
بقول يا ميدو انت طموحك فى الحياة ايه ؟
قالى يعنى ايه ؟
قولتله يعنى نفسك تبقى ايه ؟
قالى نفسى ابقى مقاول واجيب صنايعيه يشتغلوا لحسابى وابقى معلم
قلتله طيب لازمك كام سنه على ما تبقى كده
قالى مش اقل من 20 سنه لما يبقى عندى 40 او 45 سنه كده ولازملى فلوس كمان
قولتله ده اللى انت نفسك فيه وبتشتغل له من دلوقتى
طيب جميل يا معلم ولعلى سيجاره بقى وخش عليا
عارف الأستاذ فتحى اللى من بلدنا ده وعايش فى مصر
قالى اه عارفه
قولتله ده بيشتغل ايه
قالى مدير فرع شركة
قولتله طيب ده ايه رايك فيه
قالى راجل باشا ودماغه توزن بلد
قلتله طيب هو بقى كده ازاى
قالى اتعلم وعرف منين يجيب القرش
قولتله طيب والقرش بكام دلوقتى
قالى بـ 80 جنيه المغربى
قولتله على ابوه ولا مضروب
قالى لا حاسب مافيش على ابوه دلوقتى الكلام ده كان زمان ايام سيدي وسيدك
طيب بس فيه درجه اولى ودرجه تانيه
انت راجل بتفهم عشان كده عندي ليك نفحه انما ايه بقى هاتمنجهك
يالله بينا كانشة
هارش
هارش يا معلم
مساء الفل
قال بتقرى ليه قال
7 comments:
كتير بيستغرب الناس لما يشوفنى بشترى كتب أو مهتم بقضيه معينة و بيبصولى بصة المتخلف عقليا و زى ما زميل القهوة بتاعك عايز يطلع مقاول انفار فى كتير نفسهم يشتروا ميكروبصات و يكونوا امبراطوريه وصباحهمخدرات و هى الحياة ماشية
مجرد سؤال بتقرا لية ؟ محير
مش لانة سؤال صعب لاء
هو ازاى بس بني آدم يسال السؤال دا
زي اليسالك مثلا بتاكل لية؟
حتقول عشان اعيش
وكمان بنقرا عشان نعيش ونفهم ونتعلم
اولا مبروك المدونة الجديدة يسيدى
ثانيا السؤال محير ليه بس
مش محير ولا حاجة
زى ماهو نفسه يكون مقاول كبير انت كمان قوله انك نفسك تكون مقاول برضه بس فى الثقافة والعلم
ولا اييييييييه؟؟؟؟
مبروك على المدونة
ahmed_h
صباح الدماغ يا معلم بما انك أول من يعلق فى الصومعه لازم أنفحك نفحة تمام تمنجهك على راى ميدو
بس زى مانت عارف مافيش اليومين دول غير الهجين يعنى اللى على ابوه ماعادش فيه منه
هارش ؟
هو الموضوع كان على ايه ؟
الزعيمه
مرة واحد كان بيسال طالب من زمايلنا أنت ايه هواياتك
رد قاله القرايه
قاله ياحبيبى القرايه مش هوايه القرايه عمل يومى مش مجرد هواية
بس للأسف الترجمه بقى للى احنا بنقراه تبقى ازاى ؟
تعرفى تجاوبينى ؟
فعلا بنقرا لكتاب عظام وادباء كبار بس بنطلع بايه لنفسنا وللعالم اللى حوالينا
عايزين نترجم بقى
منوره يا زعيمه
عاشقة الوطن
أهلا بيكى فى الصومعه
الله يباركلك يا ستى
بتقولى ايه بقى سعادتك
اقوله انا نفسى اطلع مقاول برضه
بس فى الثقافه والعلم
ههههههههههههههه
انتى للدرجه دي بتكرهينى بقى
عايزانى ابقى سوسن بتاعة القعده
ويستلمونى تريقه
مقاول ثقافه وعلم
عندي للباشا فرشة فكر حر على كام طن نظريات فى الفلسفه والوهبه تبقى آخر ابداعات تولستوى وفرويد
مساء الجمال على عيونك
طب ما الرااااااااجل معه حق برضه
انت بتقرا ليه؟؟؟
قال قراءة ووجع دماغ وكلام بالفصحى يفلت منك وانت قاعد قال
ماهى القراءة كلام مطبوع على ورق ممكن يسمع اجدع منه فى شرايط بعرور
طب بذمتك يا عم الكتب بتاعتك ولا ملحمة العبد والشيطان ؟؟؟؟ ولا بلاش ملحمة دي لا يفتكرنى باشتمه.. قصدى أغنية العبد والشيطان
برضه ما قلتليش.. أنت بتقرا ليييييييييه ؟؟؟؟؟؟؟؟
Post a Comment