خمس شهور فى الدوحه مرو بحلوهم ومرهم
أيام طويله ورخمه وغبيه وساعات حلوة وغنية بمواقف وحوارات صعب تتنسي
مابين يأس من وضع موجود وأمر واقع
وبين نظرة أمل لمستقبل وأمانى حلوة للى جاى
مابين فرحة وثورة عاطفيه
وبين كبوة وخيبة قويه
مابين إحساس بالقيمة والثقه
وبين إحساس بالدونية وقلة الحيله
مابين تحدي وإنتصار بعد عناد
وبين إستسلام وإستكانه ولامبالاه
صراعات داخليه مؤذيه للنفس البشرية اللى أضعف بكتير من تحمل كل هذه التناقضات على أساس قلة الخبره وقلة الثقه ممكن وإحتمال برضه قلة العزم والإراده
صحيح علمتنا وبتعلمنا ولسه هاتعلمنا
بس التمن غالى
وكان زمان واحد قال كلمه جميله قوى
لو قدر لنا أن نبيع خبراتنا بالثمن الذي دفعناه فيها لما إستطاع أحد أن يدفع الثمن
صح وصح جدا كمان
والتعامل مع نوعيات البشر المختلفه أكبر مدرسه وأكبر مأساة فى حالة التعامل مع بشر مش بشر
ففى تعريف البشر المتعارف عليه هم ذوو العقول
عندهم عقل بيفكرو بيه وبيستخدموه لأداء وظيفته اللى هو أصلا مخلوق عشانها
مأساة إنك تشوف ناس كده وكمان تتعامل معاهم ومطلوب إن يحصل بينكم تبادل
أخذ ورد
تبادليه يعنى فى العلاقه
ماعلينا كل ده مش موضوعنا
لأن موضوعنا هو علي
وعلي لمن لا يعرف علي
واحد من الناس اللى قابلتهم هنا
صحيح تعاملنا مع بعض كان لا يبرر الشعور اللى جوايا من ناحيته بحكم قصر المده وبحكم قلة التعامل على مدار الأيام القليله اللى قضيناها سوا هنا فى الدوحه
بس حبيت هذا الشخص وهذه الشخصيه
وللأسف ومن المؤسف إنه يقرر إنه يرجع مصر بلا عوده
وبرغم إنى سعيد بكونه قرر القرار الصح فى الوقت المناسب نوعا وإنى فرحان إنه هايرتاح من المعاناة اللى بنعانيها فى مدينة البهائم
إلا إنى بجد حزين إنه خلاص سافر ومش هاشوفه تانى لفترة طويله ولا هاسمعله وهو بيتكلم وأستمتع بكلامه وأعجب بأفكاره زي ما كان بيحصل فى المرات النادره للأسف اللى اتكلمنا فيها سوا
حتى تهريجه وهزاره كان حلو ومش مصطنع ولا دمه تقيل زي ناس
من ساعة ما مشي وأنا مش ليا نفس أدخل السكن بتاعهم
ترابيزة الإستيميشن مش هالاقي على بيلعب عليها
ولا هادخل أوضته ألاقيه قاعد فاتح اللاب توب وعبارة
crimson love
مكتوبه عليه
مش هادخل عالنت الاقيه حاتط نيك نيم معبر عن الوضع السائد فى مدينة البهائم
ذو العقل يشقى فى النعيم بعقلة
وأخو الجهالة فى الشقاوة ينعم
أو
غابه فيها قرد بيحكم وكلب بيحل يبقى قعاد الأسد فيها خذى وعار .. عفوا نحن فى زمن البهائم
والأسد قرر خلاص يسيبها ويرحل بمزاجه
أو
press F5
أو
ماباخافش وأنت عارف
وحشتني قوي ياعلي ومش عارف ليه كل ماتعلق بحد يغيب عني
ناس كتير قوي قبلك حبيتهم جدا وبدون سابق إنذار يغيبو عن عيني وينسوني
ياخسااااااااااااااااااااره
عليييييييي يا أجدع بورسعيدي
عليييييييي يا أجدع بورسعيدي
خد بالك من نفسك ياحبيبي
وحاول إننا نتقابل ونتكلم على النت كتير على قد ماتقدر
أتمنالك من كل قلبي التوفيق فى حياتك يارب
...
الجمعه 30/11/2007
6 comments:
السلام عليكم
ازيك ياملاح
هى الحياة كده لازم تلاقي اللى انت حبيته بيبعد عنك واللى انت مش طايقه قريب جدا منك
بس مسيركم ان شاء الله تتقابل انت وعلى
وربنا يصبرك على اللى انت فيه
بس هو ده حال الدنيا يوم حلو ويوم مر
يوم مع الى بتحبه ويوم بعيد عنه
الدنيا مش على مزاج حد
تحيااااتى
بداية البوست فكرنى بحلقة الشىء ونقيضه فى مسلسل تامر وشوقيه حلقة تحفه
مدينة البهائم موجوده فى كل حته مش قطر بس والنسب بتختلف
الناس الكويسه زى الكنوز اللى بتجمعها فى حياتك ربنا يوفقك وتقابل دايما الناس الكويسه
عليكم السلام يا عاشقة الوطن
منورة الصومعه
ماعتقدش إن فيه منطق يخلينا نقول هي الحياه كده
لأننا لو قولنا كده هاتفضل كده
الحياه أجمل من كده بكتير
ساعة مانقول ده هاتبقى افضل
ولا إيه؟
وبايدنا دايما نبقى قريبين من اللى بنحبهم لو بنحبهم وهما بيحبونا صعب نبقى بعيد عنهم علينا وعليهم
وده الى أنا إكتشفته هنا
رغم الغربه مابعدتش عن بعض الناس
وبعدت عن البعض
دمتى بخير
مدينة البهائم
موجوده فعلا فى أماكن كتير
ومش كل الناس بتعرف تتعامل
بمنطقهم
لأنه لامنطقي
لامعقول
لا تشرب الدواء
لأن به سم قاتل
شرفتى الصومعه
يا سيدة الصمت الأولى
جميل جدا ان تجد اصدقاء واحباء في الغربة ، هؤلاء الأصدقاء قد يساعدون علي مرور الأيام الصعبة في الغربة المريرة ، لكن الأجمل ان تجد مرآة تري فيها نفسك بتفاصيلها ، التفاصيل التي لا يعرفها غيرك ولا يراها سواك، وقد كنت انت ايها الملاح كالمرآة التي أري فيها نفسي ، اري فيها ثورتي علي أوضاع لم أكن طرفا في صنعها بل انه لم يؤخذ رأيي في صياغتها ، اري فيها أملي في تغيير هذه الأوضاع والحلم بغد أفضل ، أري فيها يأسي واحباطي الذي ينتابني بين الحين والآخر يأس من تغيير هذا الواقع ، اشخاص قليلة ممن عرفتهم يهتمون بتفاصيلي وأنت منهم ، اشكر لك روحك الجميلة واشكر لك رقتك المعهودة واشكر لك اهتمامك بتفاصيلي التي لا يراها ولا يشعر بها غيري ، وقد لمستها وشعرت بها لأجد نفسي أقف أمامك وكأني أف أمام نفسي.
إحساسنا الجميل بقيمة الحياة مصدره وجود أشخاص بتحسسنا بأننا مش لوحدنا
فى الفرح أو اليأس
أو أى شي
إحساس بالمشاركه
ويكفي هذا الإحساس لأن تشعر بأنك إنسان
طبيعي
لك منى أرق المنى بحياى جميله تشعر فيها دوما بالمشاركه
الملاح
Post a Comment